Սպիտակ Տունը Քոնկրեսէն 1 միլիառ տոլար խնդրած է` Եւրոպայի անվտանգութեան համար։
«Կազեթա»` յղում կատարելով «Ուաշինկթըն Փոսթ» օրաթերթին, կը հաղորդէ, որ Միացեալ Նահանգներու
նախագահ Պարաք Օպամա յայտարարած է, որ Սպիտակ տունը Քոնկրեսէն մէկ միլիառ տոլար խնդրած
է` ՕԹԱՆ-ի ծիրին մէջ իրենց դաշնակից պետութիւններու անվտանգութիւնը ամրապնդելու համար: Օպամա
ըսած է, որ Եւրոպայի կեդրոնական ու արեւելեան հատուածներուն մէջ գտնուող իրենց դաշնակիցներու
անվտանգութիւնը Միացեալ Նահանգներու անվտանգութեան գրաւականն է: Աղբիւրը կը նշէ, որ
Սպիտակ տան այս քայլը դրական կերպով ընդունուած է Արեւելեան Եւրոպայի պետութիւններու
ղեկավարներուն կողմէ: Օպամա նախապէս Քոնկրեսէն խնդրած էր 500 միլիոն տոլար յատկացնել
սուրիացի ընդդիմադիրներուն, որոնք կը փորձեն իշխանութենէն հեռացնել գործող նախագահ Պաշշար
Ասատը: